ثمرة التحدي هي العزيمه

بعد التحيه والسلام

اتمنى من اي شخص يشرفني ويدخل على مدونتي ان يقراها للاخير 

واذااستفدت منه ولو كلمه واحده اتمنى تكتبها بالتعليق الي 

انه عزالدين طالب دكتوراه ادارة موارد بشريه عمري 28 من محافظة البصرة كان عندي طموح انه ارجع العب رياضه بعد ما تركت الرياضه بسبب الدراسه ومشاغل الحياة وصار عندي كسل كلش جبير بحيث ما اكدر امشي كيلو واحد باليوم والرياضه تعنيلي كلش هوايه بحيث هي تكون مصدر لصحة الشخص الاول والتحمل بالعمل 

فمن خلال برنامج الانستغرام ومتابعة هذا الضلع 👈مرتضىthe.murt

صار وياي حدث وهو

هذا الضلع مرتضى كان عيد ميلاده 6/23 فطلب من متابعينه انه ما يعايدونه الي انه واحد منهم بل يسوون شيء لنفسهم حت تعتبر عيديه اله ويفرح بيها شوفوا بهذا الفيديو شنو كال

فكل واحد قرر يدخل بتحدي ويه نفسه وكان العدد كلش حلو وكانت التحديات مختلفه بشكل كبير فانه كان التحدي مالتي انه امارس رياضه الجري او الركض واتحدى نفسي انه اوصل لرقم يعتبر كبير لانه صار فتره ما امارس الرياضه والتحدي انه اركض 10 كيلو متر خلال ساعتين او ساعه ونص 

فكان تحدي بجميع الموازين راح احجيلكم شوي شلون كان وياي التحدي 

طبعا انه بالبدايه كلتلكم انه من اهل البصره والاغلبيه تعرف شنو جو البصره 🗺🏜وخاصةٍ كان التحدي بشهر السابع يعني تموز 🥵 وفوكاها ماكو كهرباء يعني مالي غير وكت الليل اسوي بي التحدي واكيد بالشارع وطبعا كان عملي يخلص الساعه ب 9 وانه ابدي التحدي ب 10 وهم اخذت اللقاح وصخنت يومين هاي الصوره من داخل المركز وانه ماخذ اللقاح وان شاء الله الله يبعد عنا هذا الوباء وعن احبابنا بكل مكان  

كل هذا و غير التحديات والصعوبات الي كنت اواجهها من كلام وكسر واهس وهذا بطران والدنيا حاره هي مال ركض والحمدالله استمريت الى نهاية التحدي وطبعا وهذا من الاصرار وهذا الطابع انعكس على حياتي الشخصيه بشكل ايجابي وقوى بيه روح العزيمه والتحدي ويه ذاتي بكل عمل اقوم بي .

كنت من اشوف الي يشاركون بالماراثون اكول شلون الهم طاقه تحمل كل هاي المسافات بس صار عندي الجواب طبعا انه استخدم برنامج صحتي بالايفون لتسجيل المسافات والتقدم وقدره التحمل والاجهاد والراحه المطلوبه  حت تكون ممارسه الرياضه بشكل منتظم مو عشوائي وتعلمت كيف احسب الكيلو متر عن طريق الخطوات وتعلمت اكيد هوي معلومات عن رياضه الجري عن طريق اليوتيوب مثلا هاي القناة  تعلمت منها هواي نصائح طبيه ورياضيه وايضا بعض فيديوهات كنت اتابعهن واطبقهن حت اشوف النتيجه اول يوم بديت التحدي واخر يوم من التحدي و كمية التطور والانجاز الي حققته لنفسي و راح اراويكم شوي من الانجازات الي حققتها وكانت ملموسه 

 اليوم الاول من التحدي 

اكيد كان اجهاد على عضلاتي وعلى الرئتين هم وكنت اشرب ماي كلش هواي بعد التمرين 

ومرات يكون عندي تشنج بس الحمدالله كل هاي الاعراض اصبحت بنسبه قليله او معدومه 

وهاي صوره يوم 15 من التحدي وكل اكيد من خلال الاصرار والتحدي والعزيمه

 واكيد هاي الصوره هي اخر يوم من التحدي طبعا اغلبنا فرح 🤗لانجان هناك فد انجاز فد ثمره حصلها من هذا التحدي و اكو بينا زعل وحزن😢 لان انتهت هاي التجربه الجميله والمثيره والهادفه للجميع . 

بس اكيد ما راح تنتهي لمتنا هاي ولا هذا الفيض من تبادل المعلومات وحب المساعده وتقديم العون لاي واحد من عدنا وحب الاطلاع والتعلم وكل هذا بفضل الضلوع الخاتلين وره الكواليس .

طبعا التحدي ماكان فقط ويه انفسنا بل كان ويه البقيه حت منو يكدر يفوز وينجح وهذا الشيء الي خلق روح المنافسه عدنا هواي اكو انسحبوا وما كملوا ويانا بسبب الظروف واكو هواي بدو من نص التحدي واستمروا للنهايه ويمكن يفوزون وهواي تعلمنا شغلات

اولهن انه تفتح اتصال فيديو بدون ما تردد وما تخاف وبدون ما تعدل وبدون ما تخجل وتوصل صوتك وتعبيرك بالطريقه الي تشوفها مناسبه الك وتعلمنا انه تقدم المساعده بدون مقابل وبدون السؤال بكلمة ليش وتعلمنا انه نحترم الوقت ونحترم اتخذانا لاي قرار وتعلمنا اي شغله انسويها لازم نخلي الها خطه حت نقدر مخاطرها وايجابياتها وتلعمنا انه التحدي يولد الاصرار و يولد العزيمه والعزيمه توصلك لهدفك وتعرفت على هواي اشخاص بمختلف المجالات بالتصميم باللغه بالبرمجه بالاطلاع بالرسم بالخياطه بالترويج بالتثقيف بالتنميه كل ذول اصبحوا جزء من حياتي واتمنى ان نلتقي بمكان واحد ونطرح افكارنا بهدف واحد ويكون النا تاثير ولو 5‎%‎ بالمجتمع 

اتمنى التوفيق للجميع اولهم الضلع مرتضى صاحب اجمل عيد ميلاد 🎈 ولكل واحد ضحكت وياه ومازحته وفتحت وياه نقاش او رد عليه برساله وكل شخص تعلمت منه موضوع او كلمه او برنامج او فد ملعومه بسيطه واتمنى ايضا انه نطرح فكره 🤗التحدي للاشخاص القريبين علينا ونشوف شكد النا تاثير على الحياة الاجتماعيه ونكدر نغيير بيها ولو الشيء البسيط 😚؟!!

واخيرا وليس أخرا اشكر مرتضى التميمي وشكر جنود الكواليس اللجنه الي كانوا بجانبه حت يساعدونا وشكرا اهلي الي كانوا وياي بكل لحظه واذا نسيت يذكروني اليوم لازم تركض 🏃‍♀️ وايضا ما ننسى فضل رب العالمين على نعمة الصحة والعافية والحمدالله على كل شيء صار وياي 

واخراً اتمنى من كل شخص كان وياي ضمن هذا التحدي وهاي المنافسه ان يسامحني عن اي شيء بدر مني بقصد او بدون قصد وان يتنمالي الخير كما اتمناه لكم جميعا واتمنى من مرتضى اذا فزنا بالتحدي ما يودينا بطياره جبيره خل يحجزلنا زغيره احنه ناس متواضعين تعلمنا التواضع منك 😘 مودتي وحبي وشكري لكم جميعا 🌺🌺🌹

اخوكم  عزالدين صكبان